Група од деветмина планинари во организација на членови на планинарскиот клуб „Јелак“ од Тетово изведе ноќно искачување врвот Љуботен со 2.498 метри надморска височина.
Иако овој врв не е највисокиот на Шар Планина, тој е еден од најмаркантните и по патеката за искачување и по погледот што се пружа од него во круг од 360 степени.
Самото искачување беше поделено во две фази. Првата од Старо село до планинарскиот дом Љуботен што траел околу два и пол часа и по неколкучасовен одмор во домот групата од девет планинари околу еден часот по полноќ се упатила кон врвот. По нешто над три часа тие пристигнале на Љуботен по добро маркираната патека и за летни и за зимски услови.
- Се качивме на висина од скоро 2.500 метри односно 2.498. Чекавме да изгрее сонцето и го дочекавме - изјави водичот на групата Владимир Трпковски од ПК „Јелак“.
Тетовскиот планинар Томислав Мишковски, вели дека бил повеќепати и на Љуботен, но ова му било првпат навечер и претставува голема авантура за него и покрај студеното време.
- Но вреди за ова изгрејсонце - посочува Мишковски.
За дел од учесниците ова беше двојно задоволство бидејќи за првпат се искачија на Љуботен и тоа во ноќните часови.
- Првпат сум на Љуботен, првпат на ноќно планинарење, видов и две ѕвезди паѓалки и многу добра група, се е супер овде - рече Жули Шамберлен од ПК „Јелак“.
