За најмалку 20 отсто годишно може да се намалат загубите на енергија во индустриските капацитети без какви било дополнителни вложувања ако внимателно се следи производниот процес и се детектираат пропустите.
Една од главните причини за зголемена потрошувачка на енергија во компаниите е недоволното одржување на опремата, велат од Стопанската комора на Македонија.
- Енергетската ефикасност во индустријата не подразбира само воведување нова, современа опрема и технологија, туку и преземање многу други, едноставни мерки за кои не се потребни никакви инвестиции или, практично, оптимизирање на производниот процес. Тоа го покажаа три од 12-те компании вклучени во проектот „Енергетска ефикасност во индустријата“ кои за почеток, веднаш по соработката со консултантите, ги намалија производните трошоци до пет проценти - вели Ана Петровска од Регионалниот центар за животна средина.
Според неа, меѓу причините за зголемена енергетска потрошувачка се и неводењето сметка за уклучувањето/исклучувањето на машините кои треба да работат само кога има потреба, ситните неприлагодувања на одредени вентили, несанирањето на цевките кои течат.
- Секоја од компаниите идентификуваше по најмалку 30 мерки за намалување на потрошувачката на енергија, а Вардар Доломит од Гостивар дури 100 - посочува Петровска.
Проектот „Енергетска ефикасност во индустријата“ е вреден 1,4 милиони долари, но компаниите заедно со општините и владините институции обезбедија дополнителни пет милиони долари. Се спроведува три години, а активностите предвидуваат и подигнување на капацитетите на консултантите за енергетска ефикасност не само на национално, туку и на меѓународно ниво.
