Штипското комунално претпријатие „Исар“ продолжи со изградбата на фекална канализација во приградската населба Стар Карорман. Овој проект чини 13 милиони денари.
Раководителот на работната единица Водовод и канализација во ЈП „Исар“, Бранко Горгиев вели дека во тек е и изградба на водоводна и канализациска мрежа и во една од индустриските зони.
- Екипите во Стар Карорман го довршуваат кракот 12 со комплет со приклучоци. Досега во Стар Карорман се изведени 4,5 километри на фекална канализација. Во наредниот период ќе почнеме и со изведба на водовод и канализација во населба Баби 6. Моментално се работи на изведба на водовод и канализација во новата индустриска зона ПИ Македонка, каде што активностите се во тек - вели Горгиев.
Во тек е и замената на стари со нови дигитални водомери во домаќинствата. Според Горгиев, досега се заменети 6.000 водомери или е завршено 50 отсто од работата на терен. Екипите деновиве работат во штипските населби 8 ми Ноември и Кадидаре.
Горгиев истакна дека измантиов период имаат и поголем број интервенции на фекалната канализација, која се затнува поради фрлање на влажни марамици и други предмети.
BLOG COMMENTS POWERED BY DISQUS