Зрновци ќе користи алтернативна енергија

Студијата во која се инвестирани вкупно 96 илјади евра од кои 40 илјади евра се наменети за општина Зрновци е готова, и им овозможува на жителите на општината и на потенцијалните инвеститори да ги користат местата што се посочени како алтернативни извори на енергија.

• Од студијата очекуваме многу, бидејќи со заедничка работа на нашите пријатели од општина Белица успеавме да добиеме значаен документ кој ќе влијае на развојот на општината на еколошки и енергетски план. Општината планира за потребите на водоснабдителниот систем да инсталира мала хидроцентрала со капацитет од 10 КВ, со што ќе се искористи водниот потенцијал на Зрновска река, а општината би добила бесплатна електрична енергија. Досегашното искористување на електричната енергија за пумпите од системот ќе биде заменета со електрична енергија од сопствено призводство - изјави Блаже Станков, градоначалник на Зрновци.

Сончевата енергија во општината веќе се користи во Основното училиште „Синиша Стоилов“ каде што се инсталирани сончеви панели со што водата се загрева и се користи за затоплување на спортската сала и на четири училници. Овој проект е на општина Зрновци со финансиска подршка од ГЕФ Фондацијата во висина од 28 илјади долари. Општината и училиштето прават напори рационално искористување на сончевата енергија за затоплување и на останатите простории во училишната зграда.