Вкупно 30 километри од каналската мрежа во општината Илинден се исчистени од почетокот на годинава со акцијата што ја спроведува локалната самоуправа во соработка со Водостопанство „Скопско Поле“ и ЈКП „Илинден“.
Поради рамничарскиот терен во општината, се вели во соопштението оттаму, доаѓа до постојано покачување на нивото на подземните води, па затоа со редовното одржување на главните, секундарните и терцијалните одводни канали се овозможува непречен проток на атмосферските води, се спречува настанувањето на поплави и се обезбедува чиста животна средина, која е еден од условите за квалитетен живот на населението. Поради ова, општинските власти истакнуваат дека чистењето на каналската мрежа им е еден од врвните приоритети.
Во рамките на реализацијата на Акцискиот план за чистење на каналската мрежа во изминатиот период беше извршено машинско чистење на Главен канал-Горна зона низ населените места Марино, Кадино и Мралино, во должина од 3.500 метри. Извршено е машинско и рачно чистење на Сува Река во Миладиновци, во должина од 2.600 метри и машинско и рачно чистење на секундарен канал Азмак во Марино во должина од 2.000 метри. Во тек е чистење на сисавец Топлик во населба Илинден во должина од 1.600 метри и терцијален канал во должина од 400 метри.
BLOG COMMENTS POWERED BY DISQUS